“Засгийн газрын иргэд олон нийттэй харилцах төв” нь иргэдийн санал хүсэлт, гомдол, талархал, шүүмжлэлийг хүлээн авч, холбогдох байгууллагад шилжүүлэн, шийдвэрлэлтэд хяналт тавих үүрэг бүхий байгууллага юм. Иргэд 10 сувгаар дамжуулан 11-11 төвтэй харилцаж, 2019 оны 11 сарын байдлаар 148000 гаруй санал, мэдээлэл ирүүлсэн нь уг төвийн нийгмийн хэрэгцээ шаардлагыг харуулж байна. Тус судалгаанд 11-11.mn сайтад 2018.01.01-2019.06.30-ны хугацаанд бүртгэгдсэн мэдээлэлд дүн шинжилгээ хийсэн болно. Дээрх шинжилгээг www.11-11.mn веб сайтын нээлттэй мэдээллийн хүрээнд хийсэн болно. Энэ хугацаанд тус төвд нийт 8764 мэдээлэл ирснээс 2018 онд 6049, 2019 оны хагас жилийн байдлаар 2715 мэдээлэл тус тус бүртгэгдсэн бөгөөд нийт саналын 97.9 хувьд хариу өгч саналыг хаажээ. Энэхүү тайлан нь 11-11.mn сайтад дээр дурдсан хугацаанд ирсэн санал мэдээлэлд дүн шинжилгээ хийж, тус төвийн болон олон нийтийн санал, гомдлыг шийдвэрлэж буй төрийн байгууллагуудын үйл ажиллагааг сайжруулахад чиглэсэн.