Хориннэгдүгээр зууны гуравдах арваныг бид шийдлээ хүлээсэн олон асуудалтай угтав. Монгол Улсын хувьд өнгөрөгч арван жилд гадаад өрийн дарамт эрчимтэй өссөнөөр улс орны хөгжил, эрүүл мэнд, боловсрол, нийгмийн хамгааллын салбарын санхүүжилт, илүү чухал нь иргэдийн амьдралд нөлөөлөх төлөвтэй болоод байна. Монгол Улсын Төв Банкнаас 2020 онд Монгол Улсын нийт гадаад өрийг 31.2 тэрбум ам.долларт хүрсэн гэж мэдэгдсэн. Үүний 25.8 хувь нь Монгол Улсын Засгийн газарт, 6.9 хувь нь Монгол Улсын Төв Банкинд, 67.2 хувь нь хувийн хэвшлийн аж ахуй нэгжид харъяалагдах өр байна (Монголбанк, 2021). Засгийн газрын болон хувийн хэвшлийн аж ахуй нэгжийн нийт өр 1997 онд Дотоодын Нийт Бүтээгдэхүүн (ДНБ)-ий 50 хувьд хүрэхгүй байсан бол 2019 онд 253 хувьд хүрч, Монгол улс өрийн өндөр дарамттай орон болон хувирсан (Mongol Bank, 2021) хэдий ч үргэлжлүүлэн гадаадаас зээл авсаар байна.