Нийгмийн харилцаанд оролцогч субьектыг ерөнхий байдлаар хувь хүн болон байгууллага гэсэн 2 хэлбэрт хуваан үзэж болох бөгөөд хууль зүйн хувьд ч ялгаатай зохицуулалт үйлчилдэг. Монгол Улсын Иргэний хуулийн 7 дугаар зүйлийн 7.1 дэх хэсэгт “Иргэний эрх зүйн харилцаанд оролцогч нь иргэн, хуулийн этгээд, хуулийн этгээдийн эрхгүй байгууллага байна.” хэмээн тодорхойлжээ. Өөрөөр хэлбэл, нийгмийн харилцаанд зөвхөн нэг иргэн төдийгүй хэд хэдэн иргэн өөрсдийн ашиг сонирхол, хүсэл зоригоо нэгтгэн нэгдмэл эд хөрөнгөтэй байж, эрх зүйн нэг этгээдийн хувьд эрх олж авч, үүрэг бий болгож, эрх, үүрэг хэрэгжүүлж, эрх зүйн тодорхой үр дагаврыг хариуцах шаардлага тулгардаг.